ಫ್ರಾನ್ಸಾಚ್ಯಾ 20 ವರ್ಸಾಂಚ್ಯಾ ಫ್ರೆಡರಿಕ್ ಓಝನಮಾನ್ 6 ಜಣಾಂ ತರ್ನಾಟ್ಯಾಂಕ್ ಸಾಂಗಾತಾ ಘೆವ್ನ್ 1833 ಇಸ್ವೆಂತ್ ಮಾಯಾಮೊಗಾಚೊ ಎಕ್ ಸಮ್ಮೇಳನ್ ಸ್ಥಾಪಿತ್ ಕೆಲೊ. ಹಿ 'ಸಾಂ. ವಿಶೆಂತ್ ಪಾವ್ಲಾಚಿ ಸಭಾ' ಮ್ಹಣ್ ನಾಂವಾಡ್ಲ್ಯಾ. ಸಂಸಾರಾಚಾ 125 ರಾಷ್ಟ್ರಾಂನಿ ಹಿ ಸಭಾ ವಿಸ್ತಾರುನ್ ಸುಮಾರ್ 8 ಲಾಕ್ ಜಣ್ ಸಾಂದೆ ಜಾವ್ನ್ ಸೆವಾ ದೀವ್ನ್ ಆಸಾತ್.
ಕ್ರಿಸ್ತಾಕ್ ಆನಿ ಪವಿತ್ರ್ ಸಭೆಕ್ ರುಜ್ವಾತ್ ದಿಂವ್ಚೊ, ಕಷ್ಟಾತೆಲ್ಯಾಂಚೊ ಆನಿ ದುಬ್ಳ್ಯಾಂಚೊ ಮೋಗ್ ಕರ್ಚೊ ಹ್ಯಾ ಮೆಳಾಚೊ ಪ್ರಮುಖ್ ಉದ್ದೇಶ್.
ಬ್ರಹ್ಮಾವರ್ ಫಿರ್ಗಜೆಂತ್ 1969 ಅಕ್ಟೋಬರ್ 5 ತಾರಿಕೆರ್ ಮಾ|ಬಾ| ಸಿರಿಲ್ ಅಂದ್ರಾದೆ ಹಾಂಚಾ ನಿರ್ದೇಶನಾ ಖಾಲ್ ಹಿ ಸಭಾ ಸ್ಥಾಪಿತ್ ಕೆಲಿ. ಪ್ರಸ್ತುತ್ ಮಾ|ಬಾ| ಜೋನ್ ಫೆರ್ನಾಂಡಿಸ್ ಹಾಂಚಾ ಉತ್ತೇಜನ್ ಆನಿ ನಿರ್ದೇಶನಾಖಾಲ್ ತಶೆಂಚ್ ಬರ್‍ಯಾ ಮನಾಚಾ ದಾನಿಂ ಆನಿ ಕಾರ್ಯಾಳ್ ಸಾಂದ್ಯಾಂ ಸಂಗಿಂ ಹಿ ಸಭಾ ಬೊರ್‍ಯಾನ್ ಚಲೊನ್ ಆಸಾ.
2019 ಇಸ್ವೆಂತ್ ಹಿ ಸಭಾ 50 ವರ್ಸಾಂ ಸಂಪವ್ನ್ '2020 ವರ್‍ಸಾಂತ್ ದುಬ್ಳ್ಯಾ ಕುಟ್ಮಾಂಚಿ ಆರ್ಥಿಕ್ ಪರಿಗತಿ ಸುಧಾರ್ಸುನ್ ಸ್ವಾವಲಂಬಿ ಕರಿಜಾಯ್' ಮ್ಹಳ್ಯಾ ಗೊವ್ಳಿ ಬಾಪಾಚ್ಯಾ ಆದೇಶಾ ಖಾಲ್ ಫಿರ್ಗಜೆಚ್ಯಾ ಘರ್ ನಾತ್‌ಲ್ಲ್ಯಾ ಏಕ್ ಗರ್ಜೆವಂತ್ ಕುಟ್ಮಾಕ್ ಘರ್ ಭಾಂಧ್ಚೆಂ ಯೋಜನ್ ಹಾತಿಂ ಘೆತ್‌ಲ್ಲೆಂ.
ಫಿರ್ಗಜೆಚ್ಯಾ ಸಮ್ಮೇಳನಾಂತ್ ಪ್ರಸ್ತುತ್ 15 ಜಣ್ ಸಾಂದೆ ಆಸೊನ್, ಉರ್ಬೆನ್ ಸೆವಾ ದೀವ್ನ್ ಆಸಾತ್. ಫಿರ್ಗಜ್ ಹಂತಾರ್ 7 ಪೊಸ್ಕಿಂ ಕುಟ್ಮಾಂ ಆಸಾತ್, ಏಕ್ ಅಕ್ರಿಸ್ತಾಂವ್ ಕುಟ್ಮಾಕ್ ಆಮ್ಚೆ ಥಾವ್ನ್ ಸೆವಾ ಮೆಳ್ತಾ.
ಸಾಂ. ವಿಶೆಂತ್ ಪಾವ್ಲ್ ಸಭಾ ಗ್ರೇಸ್ತ್ ಆನಿ ದುರ್ಬಳ್ಯಾಂ ಮಧೆಂ ಎಕ್ವಟಾಚೊ ಆನಿ ಮಾಯಾಮೊಗಾಚೊ ಗಾಂಚ್ ಜಾವ್ನ್ ವಾವ್ರ್ ದಿಂವ್ಚಿ ಸಭಾ ಜಾವ್ನಾಸಾ.
-
Welcome to Holy Family Church, Brahmavara.