ಬ್ರಹ್ಮಾವರಾಂತ್ ಮಾನಾಧಿಕ್ ಬಾಪ್ ಸಾಭಾಸ್ ಫೆರ್ನಾಂಡಿಸಾಚಾ ಮ್ಹಿನತೆನ್ 1937 ಇಸ್ವೆಂತ್ ಹೆಂ ಇಸ್ಕೊಲ್ ಸ್ಥಾಪಿತ್ ಜಾಲ್ಲೆಂ. ಸುರ್ವೆರ್ ಚಲಿಯಾಂ ಖಾತಿರ್ ಸ್ಥಾಪಿತ್ ಕೆಲ್ಲ್ಯಾ ಹ್ಯಾ ಇಸ್ಕೊಲಾಂತ್ ಕ್ರಮೇಣ್ ಚಲ್ಯಾಂಕೀ ಪ್ರವೇಶ್ ದಿಲ್ಲೊ. 1945 ಇಸ್ವೆಂತ್ ಹೆಂ ಇಸ್ಕೊಲ್ ಹಾಯರ್ ಪ್ರೈಮರಿ ಹಂತಾಕ್ ಉಬಾರ್‍ಲೆಂ.
ಎದೊಳ್ 18 ಸಂಚಾಲಕ್, 16 ಮುಕೆಲ್ ಮೆಸ್ತ್ರಿ ಹ್ಯಾ ಇಸ್ಕೊಲಾಚಾ ಉದರ್ಗತೆ ಖಾತಿರ್ ವಾವುರ್‍ಲ್ಯಾತ್. ಪ್ರಸ್ತುತ್ ಮಾ|ಬಾ| ಜೋನ್ ಫೆರ್ನಾಂಡಿಸಾಚ್ಯಾ ಜತ್ನೆಖಾಲ್ ಮುಖೆಲ್ ಮೆಸ್ತಿರ್ಣ್ ಝಾವ್ನ್ ಸಿ| ಸೆವಾ ದೀವ್ನ್ ಆಸಾತ್.
ಆಜ್ ಕಾಲ್ ಭೊಂವಾರಿ ಸಬಾರ್ ಇಂಗ್ಲಿಷ್ ಮೀಡಿಯಂ ಇಸ್ಕೊಲಾಂ ಚಡ್ಲ್ಯಾಂತ್. ಆಮ್ಚ್ಯಾ ಫಿರ್ಗಜೆಚೆಂ ಇಂಗ್ಲೀಷ್ ಮೀಡಿಯಂ ಇಸ್ಕೊಲ್ ಆಸುನೀ ನಿರ್ಮಲ ಕನ್ನಡ ಮೀಡಿಯಂ ಇಸ್ಕೊಲಾಚೆರ್ ಆಮ್ಚ್ಯಾ ಲೊಕಾಚೊ ಅಭಿಮಾನ್ ಉಣೊ ಜಾಂವ್ಕ್ ನಾಂ, ಹೆರ್ ಸಮಡ್ತಿಚೆಂ ಭುರ್ಗಿಂಯಿ ಹ್ಯಾ ಇಸ್ಕೊಲಾಂತ್ ಶಿಕಪ್ ಜೋಡ್ನ್ ಆಸಾತ್. ಪ್ರಸ್ತುತ್ ಬಾಲವಾಡಿ ಥಾವ್ನ್ ಸಾತ್ವೆ ಕ್ಲಾಸಿ ಮ್ಹಣಾಸರ್ ಲಗ್ಭಗ್ 275 ಭುರ್ಗಿಂ ಶಿಕಾಪ್ ಜೋಡ್ನ್ ಆಸಾತ್.
ವಿದ್ಯಾ ಇಲಾಖೆನ್ ಹ್ಯಾ ಇಸ್ಕೊಲಾ ವಿಷ್ಯಾಂತ್ ಹೊಗ್ಳಿಕ್ ಉಚಾರ್‍ಲ್ಯಾ. ನಿರ್ಮಲಾ ವಿದ್ಯಾ ಸಂಸ್ಥೊ ಹೆರ್ ಇಸ್ಕೊಲಾಂಕ್ ಮಾರ್ಗದರ್ಶನ್ ಮ್ಹಣ್ ವಾಖಣ್ಲಾಂ. ಕಥೊಲಿಕ್ ಶಿಕ್ಪಾಸಂಗಿಂ ಧಾರ್ಮಿಕ್ ಆನಿ ನೈತಿಕ್ ಶಿಕಪ್ ದಿಂವ್ಚ್ಯಾಂತ್ ಮ್ಹಿನತ್ ಘೆತ್ಲ್ಯಾ. ಭುರ್ಗ್ಯಾಂಕ್ ಸ್ಕೊಲರ್‌ಶಿಪ್ ಮೆಳಾಶೆಂ ಕರ್‍ತಾತ್. ಶಿಕ್ಪಾಂತ್, ಖೆಳಾಂತ್, ಆನಿ ಸರ್ವ್ ಸ್ಪರ್ಧ್ಯಾಂನಿ ಭುರ್ಗ್ಯಾಂಚಿ ದೆಣಿಂ ಉಜ್ವಾಡಾಕ್ ಹಾಡುಂಕ್ ಶಿಕ್ಷಕ್, ಶಿಕ್ಷಕಿಂ ಉಮೇದಿನ್ ವಾವುರ್‍ತಾತ್.
ಬರೊ ಫುಡಾರ್ ರೂಪಿತ್ ಕರ್‍ಛ್ಯಾ ವಾವ್ರಾಂತ್ ಸೆವಾ ಅರ್ಪಿಲ್ಲ್ಯಾ ಇಸ್ಕೊಲಾಚ್ಯಾ ಸರ್ವ್ ಸಂಚಾಲಕಾಂಕ್, ಮುಕೆಲ್ ಮೆಸ್ತ್ರಿಂಕ್ ಆನಿ ಶಿಕ್ಷಕಾಂಕ್ ಆನಿ ಆಧಾರ್ ದಿಲ್ಲ್ಯಾ ಸರ್ವಾಂಕ್ ಅಭಿನಂದನ್ ಫಾವೊ.
-
Welcome to Holy Family Church, Brahmavara.